RSS

Tag Archives: அரவிந்தன் நீலகண்டன்

'பழைய கணக்கு' – சில கதைகளின் வெளி

‘பழைய கணக்கு’ நூலில் உள்ள வரலாற்றுக் கதைகள் பற்றி சில கடிதங்கள் வந்தன. இக்கதைகள் என்ன மாதிரியான உத்தி? இவற்றை எப்படி எழுதுவது? என்று நண்பர் ஒருவர் கேட்டிருந்தார்.

‘பழைய கணக்கு’ற்குள் செல்வதற்கு முன் வேறு இரு சிறுகதைகளைப் பார்ப்போம்.

அரவிந்தன் நீலகண்டனின் ’அமுதம்’ என்றொரு சிறுகதை. ‘பிரானையங்கார்’ என்னும் பண்டைய நாளைய கதாபாத்திரம் ஆழ்வார்களின் அடியொற்றி சீர்திருத்தம் செய்ய முனைவதும், அதற்கான பலன்களை அனுபவிப்பதும், சில நூற்றாண்டுகள் கழித்து அந்தப் பெரியவரின் பணி எப்படி பார்க்கப்படுகிறது என்பதும் கதை. கதையில் சில விடுபடல்கள் தெரிந்தாலும், பழையதையும் புதியதையும் இணைக்கும் யுக்தி நல்ல முயற்சி. கதையின் முடிவு ஊகிக்க முடிவதாக உள்ளது. ஆக, முடிவில் வேண்டிய ‘திடுக்கிடல்’ தென்படவில்லை. ஆனால் புராணத்தையும், ஒரு கல்வெட்டையும், செவிவழிச் செய்தி ஒன்றையும் தற்கால நிகழ்வுகளையும் ஒரு புள்ளியில் இணையச் செய்யும் முயற்சி அது.

தொடர்புடைய கதை சுஜாதா தேசிகனுடைய ‘ராமானுஜலு’ என்னும் அதிரடி சின்னஞ் சிறுகதை. சிறுகதை வடிவ ஒழுங்கு மிக நேர்த்தியாய் அமைந்துள்ள, தத்துவத் தொடர்புடைய, பல நூற்றாண்டு இடைவெளியை ஒரு வரியில் இணைக்கும் முயற்சியில் இதுவும் ஒன்று. சுஜாதா கைத்தொடல் இருப்பது போன்று ஒரு தோற்றம் ஏற்படுத்தும் கதை.

‘பழைய கணக்கு’ நூலில் இதே பழைய புதிய இணைப்பை ஏற்படுத்தும் கதைகளை நான் எழுதியுள்ளேன். 200 ஆண்டுத் தொடர்பு தெரியும் வண்ணம் எழுதப்பட்ட கதைகள் அத்தொகுப்பில் உள்ளன. ‘அனுமன் சொன்ன கதை’, ‘வாசல்’ முதலானவை இந்த ரகத்தில் இருக்கும். சென்றகால அநீதி வரலாற்றில் தங்கி புனைவுகளில் வெளிப்படல். அல்லது பல நூறு ஆண்டுகால தொடர்ந்த நினைவுகூரல்களின் வழியாக மானுடத்தின் நினைவடுக்குகளிலேயே தங்கியிருந்து, தற்காலத்திய ஒரு நிகழ்வின் , காட்சியின் மூலம் உருப்பெற்று பண்டைய சித்திரத்தையும் புதிய பார்வையையும் இணைத்துப் புனைவில் வெளிப்படுவது  என்பது இந்த வகை.

இந்த மூன்றும் தொடுட்டுச் செல்லும் கதைக்களம் ஏறக்குறைய ஒன்றே.

கிளர்ந்தெழுந்த ஞானச் சுடர் பேருருவெடுத்து உலகெங்கிலும் பிரும்ம ஞானப் பேரொளி பரவச் செய்த காலம் ஒன்று பாரதத்தில் இருந்தது. அதே நேரம் மற்ற கண்டங்களில் மானுட வளர்ச்சி பிற்போக்குத்தனமாயும், தேக்க நிலையிலும் இருந்தது. பின்னர் அக்காலம் மறைந்து  பாரத தேசத்தின் ஞானப் பேரொளி மங்கி, மிலேச்ச அரசுகள் தோன்றி, இன்னமும் பின்னாலிழுக்கப்பட்டு, பெருவீழ்ச்சி அடைந்து, மக்கள் தங்களின் முன்னாளைய பெருமை மறந்து, வெறும் சோற்றுப் பிண்ட வாழ்வு வாழும் நிலையை அடைவதைப் பெருமை என்று கொள்ளும் நிலையில் வாழ்ந்து வருவர். இந்த இரு நிலைகளையும் இணைக்கும் பண்பாட்டுக் கருவியாக தத்துவம், கோவில், சிற்பம் முதலானவை திகழும்.

இந்த இணைப்பைக் கண்டுகொண்டு அதன் ஊடாகக் கதை சொல்வது என்பதே மேற்சொன்ன மூன்று கதைகளிலும் உள்ள உத்தி. இதற்கு நமது பாரத பண்பாடு, தத்துவம், சிற்பம், கலைகள் முதலியவற்றில் ஒரு சிலவற்றோடாவது  கொஞ்சம் தொடர்பு இருந்து, அந்தப் பழைய பண்பாட்டுப் பெருமைகளை மீட்டெடுக்கும் உத்வேகமோ அல்லது மீட்டெடுக்க வேண்டும் என்கிற தாபமோ இருப்பவனாக எழுத்தாளன் இருக்க வேண்டும் என்று நினைக்கிறேன்..

மொழியின் மீது ஆளுமை, பண்பாட்டின் மீது காதல், சென்ற மகோன்னதக் காலங்களின் மீதான பெருமிதம் கலந்த பரிவுப் பார்வை, நீண்ட இடைவிடாத வாசிப்பு முதலியன இருப்பின் யாரும் இம்மாதிரியான கதைகளை எழுதலாம் என்றே நினைக்கிறேன்.

 
Leave a comment

Posted by on October 10, 2016 in Writers

 

Tags: , , ,

ஆழி பெரிது – நூல் மதிப்புரை

aazhiஆழி பெரிது – இந்த நூலுக்கு ஞான பீடம் விருது கிடைக்க வேண்டும். வேறென்ன சொல்ல?

ஒவ்வொரு அத்தியாயமும் புதிய அறிவுக்களஞ்சியம். ஒவ்வொன்றிலும் உள்ள தரவுகள் பிரமிக்க வைக்கின்றன.

நூலின் ஊடே நகைச்சுவை ஒரு இழை போல் செல்வது புரிகிறது.  அதிராத, மெல்லிய நகைச்சுவை அது.

வேதத்தில் துவங்கும் பயணம் சோமம் முதலியன கடந்து பாரத ஞான மரபின் பல இழைகளையும் தொட்டுச் செல்கிறது.

பிரபஞ்சத்தை வேதம் எப்படிப் பார்க்கிறது? பிரபஞ்சத்துடன் நமக்குள்ள ஒத்திசைவு என்ன? பல சடங்குகள் ஏன் செய்யப்படுகின்றன? இவற்றிற்கும் வேதத்திற்கும் உள்ள தொடர்பு என்ன? வேதத்தில் அப்படி என்னதான் உள்ளது? இவை அனைத்திற்கும் விடை ‘ஆழி பெரிது’.

ஆசிரியர் அளிக்கும் விளக்கங்கள் வேத வரிகளுக்கான பொருளுரை அல்ல. பாரதத்தின் ஞானப்பொக்கிஷமாகிய வேதம் எப்படிப் பல நாட்டுக் கலாச்சாரங்களுடனும் தொன்மையான உறவு கொண்டுள்ளது என்பதை நீங்கள் அறிந்து கொள்ளலாம். பாரதத்தின் தொன்மங்களுக்கும் கிரேக்க, அராபியத் தொன்மங்களுக்கும் உள்ள ஒற்றுமை, வேற்றுமைகள் திறமையாகச் சொல்லப்பட்டுள்ளன.

ஒருசில விஷயங்கள் பற்றி மட்டும் பார்ப்போம்.

‘அன்னம்’ – உணவு பற்றி எவ்வளவு உயர்வான கருத்துக்கள் ? அன்னம் அதிக அளவில் உற்பத்தி செய்யப்படவேண்டிய தேவை உள்ளதை  வேதம் எப்படி உணர்த்துகிறது என்று பேசுகிறார் ஆசிரியர்.

‘சரஸ்வதி’ நதி பற்றி வரலாற்று, விஞ்ஞான, பூகோள, புராண, இலக்கிய அடிப்படையிலான தரவுகள் கொண்டு எழுதப்பட்டுள்ள செய்திகள் மெய்சிலிர்க்க வைக்கின்றன.

‘வேதத்தில் பெண் தெய்வங்கள்’ பகுதி அக்‌ஷர லக்‌ஷம் பெறும். பெண் தெய்வங்களுக்கு வேதத்தில் உள்ள ஏற்றம் மெய்சிலிர்க்க வைக்கிறது. ‘உஷஸ்’ என்று நாம் அறியும் ‘காலை’ பற்றிய விவரங்கள் நன்றாக ஆய்ந்து சொல்லப்பட்டுள்ளன.

வேதகாலத் தெய்வங்கள் யாவர்? அவர்களுக்கும் கிரேக்க தொல் தெய்வங்களுக்கும் என்ன ஒற்றுமை வேற்றுமைகள்? இவை இந்த நூலில் பேசப்படுகின்றன.

வேதத்தில் காயத்ரி மந்திரம் பற்றி எங்கு குறிப்பிடப்படுகின்றது? காயத்ரியின் பொருள் என்ன? காயத்ரி, சூரியன், அகல் விளக்கு – இவற்றின் தொடர்புகள் என்ன? அகல் விளக்கு என்னும் குறியீடு காட்டுவது என்ன?

‘சோம பானம்’ என்னும் ஒன்றின் பின் ஆசிரியர் கொடுத்துள்ள செய்திகள், அவற்றிற்கான தரவுகள் – இந்தப் பகுதியை நமது திராவிட அறிவாளர்கள் படிக்க வேண்டும்.

சிந்து சமவெளி நாகரீகத்தில் குதிரைகள் இருந்தனவா? குதிரைகள் பற்றிய செய்திகளின் மகத்துவம் என்ன? குதிரைகள் இல்லை என்று இடதுசாரி, மேற்கத்திய ஆய்வாளர்கள் நிறுவ வேண்டிய காரணம் என்ன? இதற்கும் ஆரியப் படை எடுப்பு சித்தாந்தத்துக்கும் உள்ள தொடர்பு என்ன?  இவை மிக அருமையாக, எளிமையாக, பிரமிக்கவைக்கும் ஆதாரங்களுடன் விளக்கப்படுகின்றன.

வேதகாலக் கவிகள் வானியல் சாத்திரம் அறிந்தவர்களா? வேதத்தின் காலம் என்ன? அதனை மேற்கத்திய ஆய்வாளர்கள் ஒப்புக்கொள்ளாததன் காரணங்கள் என்ன? இதுவும் சொல்லப்படுகிறது.

தமிழ்ச் சமுதாயத்திற்கும் வேதத்திற்கும் என்ன தொடர்பு? சங்க இலக்கியங்களில் வேதம் இருந்ததா? யார் என்ன பாடியுள்ளார்கள்?  இவற்றிற்கான விடை இந்த நூலில் உள்ளது.

வேதம் பிராமணர்களுக்கு மட்டுமே உரியதா? அதற்கு எதிரான விவரங்கள் என்ன? வியக்க வைக்கும் ஆராய்ச்சி.

அஸ்வமேத யாகம்,,பசு வழிபாடு, பசுவதை செய்யாமை என்பதற்கும் ஆதாரங்கள். இவை குறித்து அம்பேத்கார் சொன்னது முதலியன பேசப்படுகின்றன.

இப்படி இன்னும் பல..

இடதுசாரி போலி பகுத்தறிவு அறிவுஜீவிகள் மத்தியில், அவர்கள் சொல்வது தான் அறிவார்ந்த விளக்கம் என்று பரவலாக நம்பப்படும் வேளையில், இந்த நூல் நமது பல நூற்றாண்டு உறக்கத்தைக் கலைத்துத் தட்டி எழுப்பி எழுந்து உட்காரச் செய்கிறது.

‘நாம் யார்?’ என்கிற கேள்வியை அஹோபில மடம் 44-வது பட்டம் ஜீயர் சுவாமிகள் பலமுறை தமது பேருரைகளில் விளக்கியுள்ளார். நான் சிறுவனாக இருந்த காலத்தில் வேதாந்தம் குறித்த ஒரு ஈர்ப்பு ஏற்பட அவரது சொற்பொழிவுகள் ஒரு முக்கிய காரணம்.

இன்று அந்த மகான் இருந்திருந்தால் ‘ஆழி பெரிது’ கண்டு புளகாங்கிதம் அடைந்திருப்பார்.

இந்த நூலை இங்கு வாங்கலாம்.

 
2 Comments

Posted by on August 13, 2016 in book review, Writers

 

Tags: ,

 
%d bloggers like this: