RSS

Tag Archives: பழைய கணக்கு

வைணவன் – சங்கர மடம். என்ன தொடர்பு ?

எனது ‘பழைய கணக்கு’ நூலில் ‘தரிசனம்’ என்றொரு கதை ( கதை அல்ல. நிகழ்வு). காஞ்சி மாஹாஸ்வாமிகள், ஜெயேந்திர சரஸ்வதி ஸ்வாமிகள் பற்றிய நிகழ்வு ஒன்று வரும். இதனைப் படித்துவிட்டு வாசகர் ஒருவர்: ‘வைஷ்ணவனான நீ எப்படி சங்கர மடத்துக்கு போனே?’ என்று கேட்டார். இது ஏதோ எடக்கு முடக்கான கேள்வி என்று வாளாவிருந்தேன். ஆனால் நிஜமான சந்தேகம் போல. மீண்டும் செய்தி அனுப்பியுள்ளார். ஆகையால் பொதுவெளியில் பதில்.

ஐயா, சன்யாசிகள் ந்ருசிம்ஹ ஸ்வரூபம் என்று சொல்லப்படுவதுண்டு. அதனால் தான் எந்த சன்யாசியைப் பார்த்தாலும் பார்த்த இடத்திலேயே விழுந்து வணங்க வேண்டும் என்னும் வழக்கம் உள்ளது.

18 ஆண்டுகளுக்கு முன்பு எனக்கு ஒரு கனவு வந்தது. நான் ஆற்றில் நீராடச் செல்கிறேன். ஆற்றில் இறங்கி கரையைப் பார்க்கிறேன். ஜெயேந்திர சரஸ்வதி ஸ்வாமிகள் கரையில் நடந்து செல்கிறார். சிறிது தூரம் சென்று அவரும் ஆற்றில் இறங்குகிறார். நான் ஆற்றில் இருந்து எழும் போது என் கையில் ஜெயேந்திரரது ‘தண்டம்’ (அவர்கள் கையில் வைத்திருக்கும் ஒற்றைக் கழி) அகப்படுகிறது. அதை எடுத்து என்ன செய்வதென்று தெரியாமல் கரையில் என் அம்மாவைத் தேடுகிறேன். அங்கு ஜெயேந்திரர் நீராடி, விபூதி, வேறு துவராடை அணிந்துகொண்டு என்னைப் பார்த்து சிரித்தபடியே கையைத் தூக்கி ஆசீர்வதித்தபடி செல்கிறார்.

கனவில் கண்டதை என் அம்மாவிடம் சொல்ல, என் தாயார் அடுத்த வாரமே காஞ்சிபுரம் சென்றார். ஜெயேந்திர ஸ்வாமிகளிடம் இதைத் தெரிவிக்க, அவருக்கே உரித்தான அந்தப் பளீர் சிரிப்புடன்,’உங்காத்துல ந்ருசிம்ஹ ஆராதனை உண்டோனோ?’ என்கிறார். ‘ஆஹா, ந்ருசிம்ஹனே எங்கள் ஆராத்ய தெய்வம். நாங்கள் அஹோபில மட சம்பிரதாயம்’ என்று என் அம்மா சொல்ல, பெரியவர், புன்முறுவலுடன், ‘சன்யாசிகள் தரிசனம் ந்ருசிம்ஹ கடாக்ஷ்ம். பையன் நன்னா வருவான்.’ என்று குங்குமப் பிரசாதம் கொடுத்து அனுப்பி வைத்தார்.

அந்த மாதம் எனக்குத் திருமணம் நிச்சயமானது. இன்று 19-வது திருமண நாள்.

இது ஒருபுறமிருக்க, என் தாத்தா ஸ்வர்க்கீய கனபாடி ஆமருவியாச்சாரியார் காஞ்சி மஹாஸ்வாமிகளிடம் கனம் பாடி தங்கத் தோடா பரிசு வாங்கியவர். காஞ்சி, சிருங்கேரி மடங்களுக்கும் எங்கள் குடும்பத்துக்கும் நெருங்கிய தொடர்புண்டு. எனது பெரியப்பா ராமபத்ராச்சார்யர் எழுதிய ‘ஆழ்வார்கள்’ பற்றிய பல நூல்களுக்குக் காஞ்சி மடம் ஶ்ரீமுகம் அளித்துள்ளது. ‘பரகாலன் கண்ட பரிமள அரங்கன்’ என்னும் நூலை மஹாஸ்வாமிகள் கண்பார்வை மங்கியிருந்தாலும் முழுதும் படித்துத் தனது சந்தோஷத்தைத் தெரியப்படுத்தினார்.

தமிழகத்தில் சனாதன தர்மம் தழைக்கக் காஞ்சி மடம் ஆற்றியுள்ள பணி மகத்தானது. அதனாலேயே அது போலி பகுத்தறிவு மதமாற்றச் சக்திகளால் அல்லலுக்குள்ளானது என்பது யாவரும் அறிந்ததே.

To cut the long story short: சன்யாச ஆஸ்ரமம் ஏற்றுள்ள வைதீக மதஸ்தர்களிடையே வேறுபாடு பாராட்டக் கூடாது என்பது நமது சம்பிரதாயம். ‘யதிகள்’ என்று சொல்லி வணங்குவதே முறை. சுபம்.

 
1 Comment

Posted by on March 11, 2017 in Writers

 

Tags: , ,

'பழைய கணக்கு' – சில கதைகளின் வெளி

‘பழைய கணக்கு’ நூலில் உள்ள வரலாற்றுக் கதைகள் பற்றி சில கடிதங்கள் வந்தன. இக்கதைகள் என்ன மாதிரியான உத்தி? இவற்றை எப்படி எழுதுவது? என்று நண்பர் ஒருவர் கேட்டிருந்தார்.

‘பழைய கணக்கு’ற்குள் செல்வதற்கு முன் வேறு இரு சிறுகதைகளைப் பார்ப்போம்.

அரவிந்தன் நீலகண்டனின் ’அமுதம்’ என்றொரு சிறுகதை. ‘பிரானையங்கார்’ என்னும் பண்டைய நாளைய கதாபாத்திரம் ஆழ்வார்களின் அடியொற்றி சீர்திருத்தம் செய்ய முனைவதும், அதற்கான பலன்களை அனுபவிப்பதும், சில நூற்றாண்டுகள் கழித்து அந்தப் பெரியவரின் பணி எப்படி பார்க்கப்படுகிறது என்பதும் கதை. கதையில் சில விடுபடல்கள் தெரிந்தாலும், பழையதையும் புதியதையும் இணைக்கும் யுக்தி நல்ல முயற்சி. கதையின் முடிவு ஊகிக்க முடிவதாக உள்ளது. ஆக, முடிவில் வேண்டிய ‘திடுக்கிடல்’ தென்படவில்லை. ஆனால் புராணத்தையும், ஒரு கல்வெட்டையும், செவிவழிச் செய்தி ஒன்றையும் தற்கால நிகழ்வுகளையும் ஒரு புள்ளியில் இணையச் செய்யும் முயற்சி அது.

தொடர்புடைய கதை சுஜாதா தேசிகனுடைய ‘ராமானுஜலு’ என்னும் அதிரடி சின்னஞ் சிறுகதை. சிறுகதை வடிவ ஒழுங்கு மிக நேர்த்தியாய் அமைந்துள்ள, தத்துவத் தொடர்புடைய, பல நூற்றாண்டு இடைவெளியை ஒரு வரியில் இணைக்கும் முயற்சியில் இதுவும் ஒன்று. சுஜாதா கைத்தொடல் இருப்பது போன்று ஒரு தோற்றம் ஏற்படுத்தும் கதை.

‘பழைய கணக்கு’ நூலில் இதே பழைய புதிய இணைப்பை ஏற்படுத்தும் கதைகளை நான் எழுதியுள்ளேன். 200 ஆண்டுத் தொடர்பு தெரியும் வண்ணம் எழுதப்பட்ட கதைகள் அத்தொகுப்பில் உள்ளன. ‘அனுமன் சொன்ன கதை’, ‘வாசல்’ முதலானவை இந்த ரகத்தில் இருக்கும். சென்றகால அநீதி வரலாற்றில் தங்கி புனைவுகளில் வெளிப்படல். அல்லது பல நூறு ஆண்டுகால தொடர்ந்த நினைவுகூரல்களின் வழியாக மானுடத்தின் நினைவடுக்குகளிலேயே தங்கியிருந்து, தற்காலத்திய ஒரு நிகழ்வின் , காட்சியின் மூலம் உருப்பெற்று பண்டைய சித்திரத்தையும் புதிய பார்வையையும் இணைத்துப் புனைவில் வெளிப்படுவது  என்பது இந்த வகை.

இந்த மூன்றும் தொடுட்டுச் செல்லும் கதைக்களம் ஏறக்குறைய ஒன்றே.

கிளர்ந்தெழுந்த ஞானச் சுடர் பேருருவெடுத்து உலகெங்கிலும் பிரும்ம ஞானப் பேரொளி பரவச் செய்த காலம் ஒன்று பாரதத்தில் இருந்தது. அதே நேரம் மற்ற கண்டங்களில் மானுட வளர்ச்சி பிற்போக்குத்தனமாயும், தேக்க நிலையிலும் இருந்தது. பின்னர் அக்காலம் மறைந்து  பாரத தேசத்தின் ஞானப் பேரொளி மங்கி, மிலேச்ச அரசுகள் தோன்றி, இன்னமும் பின்னாலிழுக்கப்பட்டு, பெருவீழ்ச்சி அடைந்து, மக்கள் தங்களின் முன்னாளைய பெருமை மறந்து, வெறும் சோற்றுப் பிண்ட வாழ்வு வாழும் நிலையை அடைவதைப் பெருமை என்று கொள்ளும் நிலையில் வாழ்ந்து வருவர். இந்த இரு நிலைகளையும் இணைக்கும் பண்பாட்டுக் கருவியாக தத்துவம், கோவில், சிற்பம் முதலானவை திகழும்.

இந்த இணைப்பைக் கண்டுகொண்டு அதன் ஊடாகக் கதை சொல்வது என்பதே மேற்சொன்ன மூன்று கதைகளிலும் உள்ள உத்தி. இதற்கு நமது பாரத பண்பாடு, தத்துவம், சிற்பம், கலைகள் முதலியவற்றில் ஒரு சிலவற்றோடாவது  கொஞ்சம் தொடர்பு இருந்து, அந்தப் பழைய பண்பாட்டுப் பெருமைகளை மீட்டெடுக்கும் உத்வேகமோ அல்லது மீட்டெடுக்க வேண்டும் என்கிற தாபமோ இருப்பவனாக எழுத்தாளன் இருக்க வேண்டும் என்று நினைக்கிறேன்..

மொழியின் மீது ஆளுமை, பண்பாட்டின் மீது காதல், சென்ற மகோன்னதக் காலங்களின் மீதான பெருமிதம் கலந்த பரிவுப் பார்வை, நீண்ட இடைவிடாத வாசிப்பு முதலியன இருப்பின் யாரும் இம்மாதிரியான கதைகளை எழுதலாம் என்றே நினைக்கிறேன்.

 
Leave a comment

Posted by on October 10, 2016 in Writers

 

Tags: , , ,

ஒரு அங்கீகாரம்

தெய்வத்தின் அனுக்கிரகத்தால் அடியேனின் ‘பழைய கணக்கு’ நூலில் உள்ள ‘ஸார் வீட்டுக்குப் போகணும்’ சிறுகதை இந்திய அரசின் மனிதவளத்துறை அமைச்சின் கீழ் இயங்கும் தேசிய புத்தக வாரியத்தின் (National Book Trust) ‘புது எழுத்து’ என்னும் தேர்வு செய்யப்பட்ட 25 சிறுகதைகளில் ஒன்றாக வெளிவந்துள்ளது.

Smrithi Irani Book Releaseஇந்திய அமைச்சர் திருமதி. ஸ்மிருதி இரானி அவர்கள் இந்த நூலை தில்லியில் உலகப் புத்தகத் திருவிழாவில் வெளியிட்டுள்ளார்.

தமிழகத்தின் ஐந்திணைகளைக் குறிக்கும் விதமான கதைகளைத் தேர்ந்தெடுத்துள்ளனர்.

தேர்வு செய்து தொகுத்த சாகித்திய விருது பெற்ற எழுத்தாளர் ஜோ.டி.குரூஸ் தனது வலைப்பக்கத்தில் சொல்கிறார்:

‘இந்தத் தொகுப்பிற்காகத் தமிழகத்தின் இளம் படைப்பாளர்களின் சிறுகதைகளைத் தொகுக்க நேர்ந்த போதும் இதே பரவசம் என்னுள்… பல்வேறு நிலப் பரப்பின் கதைமாந்தர்கள் ரத்தமும், சதையுமாக என்னருகே வந்து என் தோளோடு தோளுரசித் தங்களது இருப்பை, பண்பாட்டை எனக்குச் சொல்லாமல் சொல்லிச் சென்றார்கள். படைப்பாளர்களுக்கு நன்றி.

முடிந்தவரை அனைத்து நிலப்பரப்பின் பங்களிப்பும் இருக்க வேண்டும் என்ற எண்ணம் இருந்தது. போதிய கால அவகாசம் இல்லாமை என்ற சவாலை எதிர்கொண்ட போதிலும், இது போன்றதொரு அரிய வாய்ப்பில் இளம் தமிழ் படைப்பாளர்களை இடம்பெறச் செய்துவிட வேண்டும் என்ற உந்துதலே, இந்த முயற்சியை முன்னெடுத்துச் சென்றது.

ஒரு வாசகன், சரியான தளத்தில் இந்தக் கதைகளுள் ஊடாடும் அறத்தை, வாழ்தலின் உணர்தலை தரிசிப்பானேயானால் அதுவே இம் முயற்சிக்குக் கிடைத்த வெற்றி என்பேன்.

அவருக்கும் அவர் தம் குழுவினருக்கும், மனித வள அமைச்சுக்கும், இதுவரை ஆதரவளித்த வாசகர்களுக்கும், இனிமேல் படிக்கவிருக்கும் வாசகர்களுக்கும் என் நெகிழ்ச்சியான நன்றி.

Puthu ezhuththuஅறத்தின் அடிப்படையில் வாழ்ந்து முடித்த பல வாழ்க்கைகள் வரலாற்றில் எழுதப்படாமலேயே போவது நிதர்ஸனம். அது நிகழாமல் முடிந்தவரை பழைய கணக்கில் இந்த ‘அறம்’ என்னும் பழைய கணக்கையும் பதிவு செய்திருந்தேன். வாழ்ந்து முடித்த அற நெறியாளர்கள் மேலுலகில் இருந்து வாழ்த்தியிருப்பார்கள் போலும். அது இந்த அங்கீகாரமாய் ஒளிர்ந்திருக்கிறது என்று நினைக்கிறேன்.

அடியேனின் முதல் நூலிற்குக் கிடைத்துள்ள அங்கீகாரம் வாசகர் வட்ட நண்பர்களுக்குக் காணிக்கை.

என் நூலை வாங்க அமேசானில் கிளிக்கவும்.

For news item in Dinamani on this, click here

 

 

Tags: , , ,

நூலினால் ஆன பயன்

‘பழைய கணக்கு’ நூல் விற்பனை மூலம் கிடைத்த ரூ.10,000 பணத்தேவை உள்ள ஒரு பட்டயக் கணக்கியல்  மாணவருக்கு அவரது கல்வித்தொகையாக அனுப்பப்பட்டுள்ளது. நூலினால் பெற்ற நிறைவான பயன் அது.

Pazhaiya Kanakku Gift

 
Leave a comment

Posted by on October 3, 2015 in Writers

 

Tags:

பழைய கணக்கு – வாசகர் கடிதம்

மதிப்புக்குரிய திரு ஆமருவி தேவநாதன் அவர்களுக்கு

வணக்கம். தங்களது பழைய கணக்கு சிறுகதை தொகுப்பை எனது மகனின் மாமனார் திரு சம்பத் அளித்தார். இன்னும் பக்கங்கள் இருக்கக் கூடாதா என்ற ஏக்கம்தான் தோன்றியது அதை வாசித்து முடித்ததும். உண்மைக் கதைகள் என்றாலும் நடை முறை வாழ்க்கையில் நாம் காணும் ஒவ்வொரு மனிதனிலும், நிகழ்ச்சியிலும் இத்தனை பரிமாணங்களைக் காணக் கூடிய பார்வை எல்லோருக்கும் வாய்ப்பதில்லை. வாய்த்தாலும் அதை ஒரு கலைப் படைப்பாக வெளியிடும் திறன் யாரோ ஒருவருக்குத்தான் அபூர்வமாக அமைகிறது. இரண்டும் உங்களுக்கு அமைந்தது என்போன்ற வாசகர்களுக்கு மகிழ்ச்சியும் நிறைவும் தரும் விஷயம்.

கம்பன் வீட்டுக் கட்டுத் தறியே கவி பாடும் என்னும்போது தேரழுந்தூரில் பிறந்த நீங்கள் எழுதுவது வியப்பில்லை. மனிதநேயமும் , இயற்கையான நகைச்சுவை உணர்வும் ஒவ்வொரு கதையிலும் வெளிப்படுகின்றன. ரசிகனாக, சாக்ஷியாக நீங்கள் ஒவ்வொன்றையும் வர்ணிக்கும்போது வார்த்தைகள் சுகமாக வந்து விழுவது ஆனந்தம்.

உங்களது அடுத்த வெளியீட்டை ஆவலோடு எதிர்பார்க்கிறேன்.

ஸு ஜாதா விஜயராகவன்

———————————-
அன்புடையீர்,

உங்கள் அன்பிற்கும் ஆசிக்கும் நான் என்ன கைமாறு செய்வது என்று தெரியவில்லை.

நூல் படித்து மகிழ்ந்தது குறித்து மகிழ்ச்சி.

விரைவில் ‘நான் இராமானுசன்’ என்னும் தத்துவம் சார்ந்த நாவல் வெளி வர இருக்கிறது.

சில ஆங்கில நூல்களும் வரிசையில் உள்ளன.

உங்களின் தொடர்ந்த நல்லாதரவு வேண்டுகிறேன்.

நன்றி

 
Leave a comment

Posted by on April 18, 2015 in Writers

 

Tags: ,

பழைய கணக்கு – மூத்த எழுத்தாளர் ஏ.பி.ராமன் அவர்களின் ஆசி

அன்பான ஆமருவி, ‘பழைய கணக்கு’ பற்றிய புதிய கணக்கை நான் சொல்கிறேன். நீங்களே எழுதி, நீங்களே உங்கள் நூல் வெளியீட்டு விழாவைப் பற்றி எழுதுவதை விட , அந்நூல் வெளியீட்டில் கலந்து கொண்டு, உங்கள் அன்பான வேண்டுகோளுக்கிணங்கி முதல் நூலைப் பெற்றவன் என்ற முறையில் சில வார்த்தகள் எழுதுகிறேன். இத்தனை எழுத்து ஆற்றலும், மொழி ஞானமும் உள்ள நீங்கள் ,முதன் முதலாக இங்கே இந்த நூலை வெளியிடுவது பெருமைக்குரியது. இந்திய எழுத்துலகில் புகழ்பெற்ற ஒரு தமிழ் எழுத்தாளரின் வாழ்த்தோடும், ஆசியுடனும் நூலை வெளியிட்டது என்றும் நினைவிற்குரியது. உள்ளே கதைகள் ஒவ்வொன்றும் ரத்தினங்களாக ஜொலிக்கின்றன. நேற்றிரவே எல்லாக் கதைகளையும் படித்து முடித்த என் மனைவி, , நெஞ்சு நிரம்பிய சொற்களால் உங்களைப் புகழ்ந்து மகிழ்ந்தாள். நல்லாசிகள். நிறைய எழுதுங்கள். ஏ.பி.ராமன். ,

 
Leave a comment

Posted by on March 16, 2015 in Writers

 

Tags:

'பழைய கணக்கு' – நூல் வெளியீடு – நிகழ்வுகள்

நேற்று 07-மார்ச்-2015 சனிக்கிழமை 6 மணி அளவில் எனது நூல் ‘பழைய கணக்கு’ எழுத்தாளர் ஜோ டிகுரூஸ் மற்றும் இராமகண்ணபிரான் அவர்களால் வெளியிடப்பட்டது. திரு.அ.கி.வரதராஜன் அவர்கள் நூலுக்கான அறிமுகம் செய்து வைத்தார். முதல் பிரதியை திரு. ஏ.பி.ராமன் அவர்கள் பெற்றுக்கொண்டார்..

‘பழைய கணக்கு’- நூல் அறிமுகம்- திரு.அ.கி.வரதராஜன் அவர்கள்

சிங்கப்பூர் வாசகர் வட்டம் 26ம் ஆண்டு விழா – ஜோ டிகுரூஸ் உரை

 
1 Comment

Posted by on March 9, 2015 in Writers

 

Tags: , , , , ,

 
%d bloggers like this: